Cymraeg a Hanes Bachelor of Arts (with Honours) - BA (Hons)

Mae ein gradd BA mewn Cymraeg a Hanes ddynamig yn caniatáu ichi astudio'r Gymraeg, ei llenyddiaeth a'i diwylliant wrth archwilio a deall cyfnodau allweddol mewn hanes.

Bydd eich modiwlau Cymraeg yn eich galluogi i ddatblygu sgiliau academaidd a phroffesiynol hanfodol. Byddwch yn datblygu eich diddordebau mewn amrywiaeth o bynciau fel llenyddiaeth drwy'r oesoedd; ieithyddiaeth, cynllunio ieithyddol a chaffael iaith; treftadaeth; ac ysgrifennu gweithredol. Mae agwedd ryngddisgyblaethol gref i'r ddarpariaeth: gallwch ddewis modiwlau sy'n ystyried y Gymraeg, ei llenyddiaeth a'i diwylliant mewn amrywiaeth o gyd-destunau hanesyddol a chyfoes.

Bydd eich astudiaethau hanes yn eich helpu i ddatblygu eich gwybodaeth a’ch dealltwriaeth feirniadol o strwythurau gwleidyddol, cymdeithasol, economaidd a diwylliannol cymdeithasau’r gorffennol. Mae ein harbenigedd yn cwmpasu amrywiaeth anhygoel o gymdeithasau, cyfnodau a lleoedd ledled Ynysoedd Prydain, Ewrop (dwyrain a gorllewin), Affrica, Asia, a chyfandiroedd America. Cewch y cyfle i astudio meysydd sydd wedi hen ennill eu plwyf, megis hanes gwleidyddol, cymdeithasol, diwylliannol a rhywedd, neu i archwilio meysydd a allai fod yn newydd i chi, megis hanes amgylcheddol neu hanes digidol. Byddwch yn meithrin sgiliau deallusol gwerthfawr, gan gynnwys y gallu i asesu tystiolaeth yn feirniadol, gwerthuso gwahanol ddehongliadau o'r dystiolaeth, llunio dadleuon yn seiliedig ar dystiolaeth, a mynegi barn yn gref ar lafar ac yn ysgrifenedig.

Byddwch chi'n dysgu mewn amgylchedd cyfeillgar a chefnogol sydd wedi’i deilwra i chi, ac rydym yn rhoi pwyslais cryf ar gyfarfodydd unigol un-i-un ar adegau allweddol drwy gydol y radd. Mae gan eich darlithwyr lawer o arbenigedd ar draws gwahanol themâu, cyfnodau ac ardaloedd a byddan nhw’n cyflwyno’r syniadau diweddaraf yn yr ystafell ddosbarth, gan gynnwys eu hymchwil arloesol eu hunain.

Nodweddion Unigryw’r Rhaglen

Astudio gyda brwdfrydedd

Archwiliwch eich diddordebau, gyda phynciau sy'n amrywio o gaethwasiaeth yn America i hanes yr Undeb Sofietaidd a hanes Japan.

Cymuned lewyrchus

Gwnewch gysylltiadau drwy Undeb Myfyrwyr Cymru, neuaddau preswyl Cymraeg a'r Academi Gymraeg.

Dysgu gan arbenigwyr

Manteisiwch ar addysgu a chymorth gan staff gweithgar ym maes ymchwil sy'n cael eu parchu'n rhyngwladol yn eu meysydd pwnc.

Cysylltiadau’r brifddinas

Mae ein lleoliad dinesig yn ehangu ac yn cefnogi ein cysylltiadau â sefydliadau diwylliannol, gwleidyddol, treftadaeth a chyfryngau.

Cymraeg ar waith

Magu eich hyder a'ch sgiliau ymarferol drwy ddefnyddio'r Gymraeg mewn lleoliad proffesiynol ar brofiad gwaith.